Rusiye Federatsiyasınıñ Qırım işleri boyunca nazir muavini vazifesine Yelena Abramova tayin etildi. Bunıñnen bağlı buyruq Rusiye ükümetiniñ saytında derc olundı.
Vesiqanı Rusiye baş naziri Dmitriy Medvedev imzaladı.
Abramova Yelena Viktorovna 1967 senesi martnıñ 25-de dünyağa keldi. Halqara iqtisadiyat ve uquq institutı (zenaat – uquq); Rusiye Federatsiyasınıñ Prezidenti devlet hızmeti Rusiye akademiyasını (zenaat – devlet ve şeerni idare etüv) bitirdi. İqtisadiy ilimler namzeti.
2008 senesinden başlap Rusiye Federatsiyasınıñ iqtisadiyat inkişafı Nazirliginde türlü vazifelerni eda ete edi. İşlerni idare etüv Departamentiniñ müdiri, Kadrlar ve teşkiliy inkişaf Departamentiniñ yolbaşçısı edi.
Qırım işleri boyunca Nazirligini martnıñ 31-de Rusiye prezidenti Vladimir Putinniñ buyruğı esasında meydanğa ketirdiler. Onıñ esas vazifesi – icra akimiyet federal organlarınıñ Qırım ve Aqyarnıñ Rusiye iqtisadiy, maliye, kredit ve uquq sistemasına bağlanış faaliyetiniñ semereligini arttırmaqtır. Nazirlik yolbaşçısı vazifesine iqtisadiyat nazir muavini olğan Oleg Savelyev tayinlendi.
