Qırım devlet «akimiyet» icra organlarınıñ eñ çoq hadimler sayısı belgilendi.
Bunı Qırım «ükümetiniñ» matbuat hızmeti bildire.
İyünniñ 27-de Qırım «Nazirler şurasınıñ» toplaşuvında Qırım devlet «akimiyet» icra organları ve «Nazirler şurasınıñ» apparat erkânı 5772 adamdan ibare olacağı aqqında qarar bir ağızdan qabul etildi.
«Esas vazife bugünde-bugün olğan maliye qararından ziyade çıqmamaq edi. Hadimler erkânı eñ çoq 5772 adamnı teşkil etmek kerekligi belgilendi», – dep bildirdi «baş nazir muavini – Nazirler şurasınıñ apparat reberi» Larisa Opanasük.
«Sobıtiya Krıma» internet neşiriniñ malümatına köre, 2013 senesi Qırımda icra akimiyet organlarınıñ hadimler erkânı 1041 adamnı teşkil ete edi, demek, bugünki raqamdan 5,5 qat az edi. Bunıñnen beraber, Qırım Nazirler şurasınıñ belgilengen apparat erkânı 129 adamdan ibaret edi.
