Link açıqlığı

«Umma» Ukraina musulmanları Diniy İdaresi Qırım musulmanları Diniy idaresinen beraber qarar ve tedqiqler Avropa şurasınıñ qararına binaen, iyünniñ 27-de küneş qonğan soñ, Mubarek Ramazan ayı başlanmasını ilân ete.

Böylecek, iyünniñ 28 Orazanıñ ilk künü olacaqtır.

Bunı «Umma» Ukraina musulmanları Diniy idaresiniñ matbuat hızmeti bildire.

Oraza başlanğanı munasebetinen cuma künü, iyünniñ 27-de, Kiyevdeki İslâm medeniyet merkezinde (Degtâröv soq., 25a) Ramazan ayına bağışlanğan hutbe keçirilecek ve Ukraina paytahtı musulmanlarınıñ duası oqulacaq.

Ukraina musulmanları Diniy idaresi bildire ki, bu sene Ramazan Ukraina musulmanları içün kün uzunlığı sebebinden degil de, memlekette üküm sürgen vaziyetten sebep ciddiy bir sınav olacaqtır.

«Rusiye Federatsiyası Qırım yarımadasını işğal etti, Qırım musulmanlarını sorğuğa çekeler, yaqalaylar, tintüvlerge oğratalar. Musulmanlar sayısına köre ekinci olğan Donbassta arbiy areketler ketmekte. Bundan ğayrı, Ukraina musulmanları devletniñ topraq bütünligine ve tınçlıqsever ealige zarar ketire bilecek kelip çıqqan terroristlerniñ arbiy istilâsı ve yerli silâlı separatistlerge qarşı cenkleşeler. Bir çoq musulmanlar yardımcı areketlerde de iştirak eteler», – aytıla UMDİ beyanatında.

Onıñ içün bu oraza musulmanlar içün «yalıñız maneviy ceetten temizlenüv, Allahqa yaqınlaşuv ve yaşap körgenlerge qıymet kesüv degil de, arbiy istilağa qarşı Vatan oğrunda küreşte faal areketler vaqtı» olacaqtır.

«Ramazan arbiy areketler yasaq etilgen dört aydan birisidir. Lâkin mında arbiy istilâğa qarşı areketler aqqında laf kete: Vatannı qorumaq, aksine, er bir musulmannıñ borcudır», – dep qayd ettiler UMDİ.

Ramazan ayı devamında musulmanlar oraza tutıp, kündüz suv ve aştan vazgeçecekler. Ağır ayaqlı, emizdirgen analar, yedi yaşını toldurmağan balalar, hasta ve qart insanlar, seyaatçılar oraza tutmay bileler.

Nevbetteki yañı ay oraza bitkenini ve İd-al-fitr (Oraza bayram) kelgenini ifadeleycek. Tahminlerge köre, oraza iyülniñ 28-de bitecek.

XS
SM
MD
LG