Ukraina tarafdarı olğan qırımlı faaliyetçi Yelizaveta Bogutskayanıñ qızı Qırımdan çıqıp olamadı: qıznı trenden Rusiye sıñırcıları tüşürdiler.
Qırım.Aqiqat mühbirine Yelizaveta Bogutskaya aytqanı kibi, onıñ qızı Sakina pasportına yañı fotonı qoуmaq içün Ukrainağa kete edi.
Faqat Rusiye sıñırcıları Sakina Bogutskayağa onıñ ukrain pasportı aqiqiy olmağanı içün Rusiye Federatsiyasından çıqmağa yasaq olğanını bildirdiler. Olar qızğa Rusiye Federatsiyasınıñ pasportını elde etip, meseleni çezmege teklif ettiler, böyleliknen onı vatandaşlıqnı deñiştirmege mecbur ete ediler.
«Qızımnı Ermeni Bazarda toqtattılar, trenden tüşürdiler. O, Aqmescitte onıñ ukrain pasportına yañı fotonı qoymağanlarını ve bunı etmek içün onı Qırımdan yollamağanlarını aytıp, ne etecegini sıñır bekçilerinden sorağan edi. Sıñırcılar oña başta Rusiye Federatsiyasınıñ pasportını elde etip, soñra onen çıqa bilecegini ayttılar», – dedi Bogutskaya.
Qadın onıñ qızı Rusiye vatandaşlığını qabul etmegenini bildirdi, şimdi oña qıtağa ukrain pasportı ile çıqmaq içün imkân bermeyler eken.
«Demek, qızım Ukraina vatandaşı olsa bile, öz vesiqanı qanunlaştırıp olamay. Menimce, bunı Qırımda qalğan ukrainlilerge basım etmek içün mahsus uydurdılar», – dedi Yelizaveta Bogutskaya.
Yelizaveta Bogutskayanıñ sözlerine köre, eger de Rusiye sıñırcıları onı ukrain pasportı ile işğal etilgen Qırımdan Ukrainağa yollağan olsa ediler, bu daa da mantıqlı olur edi.
Al-azırda qız alâ daa Ermeni Bazarda buluna. Pasportnı oña qaytarmadılar.Eger de sıñırcılar qızğa yaqın vaqıtta vesiqalarnı qaytarmasalar, Yelizaveta Bogutskaya Ermeni Bazarğa jurnalistler ile baracaq ola.
Faaliyetçi, internet qullanıcı Yelizaveta Bogutskaya Aqmescitte yaşay. O, öz vatanperver ibareleri ile bellidir. Qavmiy rusiyeli, qırımlı Bogutskaya Rusiye vatandaşlığından resmiy şekilde vazgeçti, özüni ukrain toprağında yaşağan ukrain kibi saya.
