Eger de separatistler iyün 27 kününe planlaştırılğan körüşüvde barışıq planınıñ esas noqtaları ile razı olsalar, «ümüt peyda olur», eger de ondan vazgeçseler «müim qarar alınacaq», dep ayttı Prezident Petro Poroşenko.
Bunı Ukraina prezidenti Avropa Şuarsınıñ Parlament Assambleya deputatlarınıñ suallerine cevap olaraq ayttı, dep bildire Azatlıq Radiosı.
Amma, dey prezident, o, nasıl qarar olacağını aytıp olamaz.
Poroşenko bugün, iyün 26 künü, separatistler yarın ötkerilecek yañı körüşüvge razı olğanlarını tasdiqladı.
Evel Poroşenko PASE sessiyasında çıqışta bulunıp, Rusiye tarafından onıñ barışıq planına qol tutuvı «iç yeterli» olmağanını ve Rusiye Ukrainağa qarşı ilân etilmegen cenkni alıp barğanını qayd etti. Rusiyeni barışıq planına sözde degil de, amelde qol tutmağa çağırdı.
Prezident şunı da qayd etti ki, separatizm ğayeleri «Ukrainağa tışarından suniy şekilde yüklendi». Devlet başı «Rusiye matbuat vastaları tarafından tarqatılğan yalan ve nefert aqımlarınıñ toqtatuv» zaruriyetini de qayd etti. Bu vaziyet barışıqnıñ pekitilmesine yol bermez, dedi prezident.
Bunıñ ile Poroşenko eger de Qırım qaytarılmasa, Ukraina ile Rusiye arasında munasebetlerniñ eyileşüvi aqqında aytmağa acet olmağanını da bildirdi.
