İşğal etilgen Aqmescitte iyün 26 künü 5 adam üzerinde qırımtatar bayrağı olğan maşinağa ücüm etti. Ücüm etkenler maşinadan eki bayraqnı çıqarıp, olarnı yırtmağa ve taptamağa başladı.
QHA haber agentligi bergen malümatına köre, vaqia Samokiş ve Sevastopolskaya soqaqlarınıñ çarpazında yüz berdi.
«İnsanlardan birisi maşinağa bayraq tayağı ile urmağa başladı. Maşinada olğan yigitler bayraqlarından birisini tutıp aldılar», – dep bildire neşir.
Bunı öz közünen körgen şahısnıñ sözlerine binayen, o yerde Qırım «halq imayesi» buluna edi, amma işbu davanı toqtatmaq içün ğayret etmedi.
Bugün Qırımda iyün 26 künü Qırımtatar bayraq Künü munasebeti ile tedbirler olıp keçe. Aqmescitte milliy kiymlerde fleşmob ve avtoyürüş olıp keçti.
İşğal etilgen Qırımda Meclis iyünniñ 26-da Aqmescitteki Trenöv bağçasında keçirecek olğan Qırımtatar bayraq Kününi yasaq etip, bu qararnı bağçanı ziyaret etken «yüzlernen balalarğa» telüke olacağı ile añlattılar. Bunıñnen beraber, Qırımtatar milliy bayraq Kününe bağışlanğan avtoyürüşni yasaq ettiler.
Şeer şurasınıñ resmiy cevabında aytıla ki, «avtoyürüşte iştirak etecek maşinalar sayısı (115) iş vaqtında yolcular içün qıyınlıqlarğa yol bere bile ve olarnıñ aq-uquqlarını bozması mümkün».
Bir sıra yasaqlardan soñ, iyünniñ 23-de Aqmescitte keçirilgen matbuat konferentsiyasında Qırımtatar Milliy Meclisiniñ reisi Refat Çubarov bildirdi ki, Qırımtatar milliy bayraq Kününe bağışlanğan tedbirler, Aqmescit akimiyetiniñ yasağına baqmadan, keçirilecek. Olarnıñ ötkerilmesi «Kosmos» kinoteatriniñ meydanında mümkün.
Bundan evel yarımadada iyünniñ 6-na qadar bütün tedbirler, şu cümleden mayısnıñ 18-de Qırımtatar sürgünligi qurbanlarınıñ hatıra Künü yasaq etilgen edi.
