Qırımda yaqalanğan Оleg Sentsov ve Оleksandr Kоlçеnkonıñ cinaiy taqipniñ toqatatıluvı ve cezanıñ deñiştirüvi içün iç bir sebep yoq.
Bunı Rusiye Federatsiyasınıñ Baş prokuror muavini Viktor Grinânıñ Cemaat ve insan aqlarınıñ inkişafı boyunca Rusiye prezidenti yanındaki Şura reisi Mihail Fedotovnıñ arizasına olğan cevabında aytıla.
Baş prokuratura reisi Rusiye Qırım ve Aqyar boyunca FSB idaresinde terroristik cemiyetiniñ faaliyeti aqqında üç cinaiy iş olğanını ayta. Bu cinaiy işlerde O.Sentsov ve O.Kоlçenko qabaatlana.
Oleg Sentsovnı ve Ukrainanıñ daa üç vatandaşını Rusiye FSB hadimleri Qırımda mayıs ayında yaqaladılar. Gennadiy Afanasyevni, Aleksey Çirniyni, Aleksandr Kolçeni ve Sentsovnı Yalta, Aqmescit ve Aqyarda teraktlarnıñ azırlanuvında qabaatlaylar. Episini «Pravıy sector» teşkilâtınıñ azası olaraq adladılar.
Oleg Sentsovnı azat etmek talapları ile Rusiye prezidentine belli kinorejissörlar Pedro Almodovar, Bertran Tavernye, Ken Louç, Ancey Vayda, Kşiştof Zanussi ve digerleri muracaatta bulundılar.
Oleg Sentsov 2011 senesi «Gamer» filmni çıqardı, o Rotterdam kinofestivalniñ programmasına kirgen edi. Keçken sene «Nosorog» filmniñ leyhası içün mukâfat aldı.
Sentsovnıñ eki çağına yetmegen balası bar.
