Çarşembe künü iyün 25-nde Meclis reisi Refat Çubarov, Qırımda resmiy ziyaretnen bulunğan Poloniya müftisi Tomas Mitskeviçnen körüşti.
Meclisniñ matbat-hızmeti bildirgeni kibi, Poloniya müftisi künlerde Saq camisi ve tintüv ötkerilgen Bulğanaq medresesinde olğanını bildirdi.
Bildirüvde qayd etilgeni kibi «onıñ sözlerine köre, bu kibi areketler tarikke pek oşay, olarğa diqqat ayırılmamalı, çünki biri-birine işanç közünen baqmaq içun vaqıt kerek».
Refat Çubarov şunı qayd etti ki, soñki yılları yañı camilerniñ, minarelerniñ qurucılığı devam ete. Bu sevaplı işke para bergen iş adamlarnıñ sayısı da arttı.
Meclis reisi özüniñ nevbetinde, yarımadanıñ halqı, şu cümleden qırımtatarlar da, aşayt malları, ilâclarnıñ fiyatı öskeni, aynı zamanda alçaq aylıqlar ya da işsizlik sebebinden ağır vaziyette bulunğanını bildirdi.
Çubarov Tomas Mitskeviçke minnetdarlıq bildirip, «poloniyalılar sayesinde qırımtatar mevzusı dünyada eñ çoq muzakere etilgen mevzuğa çevirilgeni içün» Poloniya prezidentine Meclis adından teşekkürler bildirmekni rica etti.
Mitskeviç ise, iyün 30 künü Poloniya prezidenti Bronislav Komorovskiynen körüşecegi ve Qırım ziyareti aqqında tavsilâtlı şekilde ikâye etecegini söyledi. Ve qırımtatarlarnıñ aq-uquq meselesi eñ yüksek seviyede baqılmaq kerekligini ayttı.
«Qırımtatarlarnı destekleycek avropalı programmanı tesis etmek kerek, – dep qayd etti Poloniya müftisi. – Çünki ileride ne olacağı daa belli degil».
İyün 24 künü saba saat 6:30 Aqmescit rayonınıñ Bulğanaq köyünde oğlanlar içün hafizler medresesine belgisiz şahıslar sürip kirdi ve tintüvni keçirmege başladı. Medresede 13 talebe ve eki oca buluna edi. Er kes yuqlay edi.
«Berkut» hadimleri kiriş qapı ve pencereni qırıp, içeri kirdiler. İç bir vesiqa ya da mahkeme qararını köstermediler. Tintüvni tahminen 30 insan keçirdi.
Tintüv beş saat devam etti. Binanıñ içinde olğan er şeyni, edebiyatnı, bala şeylerini baqıp çıqtılar, talebelerden telefonlarnı tutıp aldılar. Tintüv bitken soñ, bir qaç bilgisayarnı alıp kettiler. Müdir muavini Ayder Osmanovnı ise bir buçuq saat sürgen soravdan keçirdiler.
Medreseden ğayrı silâlı insanlar tintüvler ile qırımtatar ailesine de sürip keldi.
