«Azaplarğa qarşı komitet» adlı uquq qorçalayıcı teşkilâtı iyün 26 künü Rusiye şeerlerinde Azap qurbanlarına qol tutuv halqara künü munasebeti ile soqaq numayışlarını keçirecek, dep bildire Azatlıq Radiosı.
Numayışlar Nijniy Novgorod, Ufa, Orenburg, Yoşkar-Ola, Groznıy şeerlerinde keçirilecek. İlk sefer bu kibi numayış «Halqara amnistiya» Rusiye temsilciligi ile Moskvada ötkerilecek.
Uquq qorçalayıcılar deyler ki, Rusiyede azaplar adiy ameliyat oldı. Er sene tahminen 60 biñ insan Rusiye uquq qorçalayıcı organlarınıñ vekilleri tarafından kösterilgen zulumğa şikâyet ete.
Mayıs ayında «Halqara amnistiya» teşkilâtı «Azaplarnı toqtatmaq!» adlı bütündünya kampaniyasını başladı. Uquq qorçalayıcılarnıñ beyanatında azaplar aqta söz ketkende ükümetlerniñ çoqusı «ekilik standartlarnı» numayış ete dep yazıla. Qanunlarda azaplarnı yasaq etip, olarnı ameliyatqa keçireler.
Soñki beş yıl devamında «Halqara amnistiya» azaplar eñ azından 141 memlekette yüz bergeni aqqında bildirgen edi. Meksika, Filippinı, Marokko, Nigeriya ve Özbeksitandaki vaziyet ciddiy qasevet doğura.
İyün 26 künü BMTnıñ azaplarğa qarşı halqara konventsiyanıñ qabul etkeninden 30 yıl ola. 1984 senesi oña Rusiye qoşuldı. 1997 senesi iyün 26 künü BMT Baş Assambleyası tarafından Azaplar qurbanlarına qol tutuv halqara künü olaraq belgilendi.
