Link açıqlığı

Saatnıñ esas haberi

Yanğın neticesinde zarar körgen Qırım camisi Ramazan ayında kene açılacaq


2013 senesi oktâbr ayında yanğın neticesinde zarar körgen Saq merkeziy camisi, tamir işleri bitkeninden soñ, iyün 27-de, cuma künü, kene de musulmanlar içün öz qapılarını açacaq.

Bunı Qırım musulmanları diniy idaresiniñ matbuat hızmeti bildire.

«İyün 27 künü mında cuma namazı qılınacaq, yatsı namazından soñ ise, muqaddes Ramazan ayınıñ ilk künü arfesinde, Saq camisinde ilk teravih namazını (mustahab namaz, Ramazan ayında farz yatsı (işa) namazından soñ qılına) oquycaqlar», – denile QMDİ beyanatında.

Mında şunı da qayd ettiler ki, yanğından soñ tamir işleri yerli musulman cemiyetiniñ ğayreti ve yerli iş admlarınıñ maliye destegi ile yapıldı. Faqat, soñuna qadar tamir işleri daa yetmedi, para yetişmey.

Saq camisinde yanğın 2013 senesi oktâbr 13 künü Qurban bayram arfesinde yüz berdi. Ateş şeerniñ merkeziy camisinde hocalıq odasında bütün şeylerni yoq etti. Ziyan 500 biñ grivnanı teşkil etti.

İyün 28-ne keçer gecesi musulmanlar içün muqaddes Ramazan ayı başlana.

Ramazan – musulman taqviminiñ doquzıncı ayı. Musulmanlar içün müim ve itibarlı bir aydır. Bütün ay devamında musulmanlar oraza tutalar. Oraza degende, kün devamında suv, yemek, mahrem munasebetlerden vazgeçüv közde tutıla.

XS
SM
MD
LG