Evel Qırım «parlamenti»niñ küz saylavlarınıñ boykot etilmesine qarşı çıqqan Meclis azaları bu meseleni baqmaq maqsadı ile Qurultaynıñ nevbetten tış sessiyasını keçirmege isteyler.
Bunı Qırım «akimiyeti»ne yaqın olğan Krıminform agentligine iyün başında Aluşta şeer başı muavini olğan Meclis azası Enver Arpatlı bildirdi.
Onıñ sözlerine köre, Meclis bu kibi müim qararlarnı qabul etip olamaz, olarnı keñ cemaat meydanında muzakere etmek kerek. Bundan soñ Qurultayda «uyğun qarar» alınmalı.
«Yaqında Meclis toplaşuvı olacaq, mında kene de saylavlar suali köterilecek. Muzakere devamında boykotqa qol tutqanlar bu mesele cemaat ve Qurultay tarafından baqılmaq kerekligini añlasalar, o vaqıt özleri de doğru qarar alıp, Qurultaynı toplarlar. Eger de añlaşılmağan, şu sırada Meclis azalarınıñ çoqusına da añlaşılmağan siyasiy oyunlar devam etse, Qurultay çağırıluvı aqta imzalarnı toplamağa kerek olur», – dey Arpatlı.
O şunı da añlattı ki, Qurultaynıñ nevbetten tış sessiyasını teşkil etmek çün azalarnıñ üçte bir qısımınıñ imzalarını toplamağa kerek. Olarnıñ umumiy sayısı ise 250 nefer insandır.
«Qırım Cumhuriyetiniñ Şeer şurası» küz saylavlarınıñ boykot etüvi aqqında qararnı qırımtatar milliy Meclis reisi Refat Çubarov bildirgen edi.
Bundan soñ, Qırım «spiker muavini» olğan Meclis azası Remzi İlyasov Meclisniñ işbu qararı acele alınğanını qayd etken edi.
