Zaporojye şeerinde de iyün 26 künü Qırımtatar bayraq Kününi qayd etecekler. Hususan, Zaporojye Avtomaydanı ve «Jenskaya sotnâ» qırımtatar halqına avtoyürüş ile qol tutmağa çağıralar.
«Dostlar! Şimdi şeer soqaqlarında bayraqlar ile yürüşni keçirmek içün vaqıt biraz kelişmey dep tüşünemiz, amma qırımlı qardaşlarımızğa tek böyleliknen qol tuta bilemiz. Er kes kelsin», – deyler teşkilâtçılar.
Avtoyürüş iştirakçileriniñ toplaşuvı saat 18:00 Zaporojye devlet memuriyeti yanında olacaq.
Qırımda Qırımtatar bayraq Künü munasebeti ile tedbirler Borçokraq mikrorayonında ötkerilecek, mından Azatlıq Radiosı ve Qırım.Aqiqat saat 17:00-den (Kiyev vaqtı boyunca saat 16:00) canlı yayınnı alıp baracaq.
Qırımtatar bayraq Kününi motoyürüş ile Kiyevde keçirecekler, qırımtatarlarğa qol tutuv numayışı Tbiliside de olacaq.
Qırımtatarlarnıñ bayrağı altın tamğalı kök tüste bir ketendir. Qırımtatar bayraq künü 2009 senesi teşkil etildi. Er yıl Qırımtatar bayraq künü munasebeti ile tedbirler Aqmescit merkezinde keçirile edi.
