Link açıqlığı

Qırımtatar Bayraq Künü: ukrain milliy kiyimlerde fleşmob, avtomobil yürüşi ve sanadaki çıqışlar


İyün 26 künü Qırımda qırımtatar milliy Bayrağına bağışlanğan tedbirler ötkerilecek.

Esas tedbirler Aqmescitniñ Borçoqraq qasabasında, qurulıp bitirilmegen mektepniñ ögündeki meydançıqta teşkil etilecek.

Programağa binaen, bayram saat 16-da qayd etilip başlaycaq, birinci «Bizim taraf» yarışında balalar iştirak etip, resim etmek qabiliyetlerini kösterecekler, ondan soñ, «Bayrağım» fotoresim yarışı ötkerilecek. Bunen beraber, aşçılar yarışlaşacaqlar, milliy-ameliy sanaat nümüneleri sergilenecek, «Bilgi quveti» kvesti ötkerilecek. Aqşam ise, qırımtatar sanaat erbaplarınıñ iştiraginen kontsert keçirilecek.

Radіo Svoboda ve Qırım.Aqiqat saytı saat 17.00 den başlap, canlı şekilde bu tedbirlerni kösterecekler.

Bundan da ğayrı, Balalar bağçasında Bayraq kününi desteklegen fleşmob ötkerilecek. Çeşit millet vekilleriniñ qoşulması közde tutula. Esasen ana ve balalar iştirak etecekler: ukrain milliy kiyim ve qırımtatar bayraqlarınen bağçada kezinecekler.

Akimiyetniñ yasaq etkenine baqmadan, avtomobil yürüşi de olacaq. Teşkilâtçılarnıñ aytqanına köre, avtomobil yürüşiniñ yolu evelden belgilenmegen edi, iştirakçiler ise para cöremesine oğratıla bileler.

«İç bir kimse maşinanı bayraqlarnen yaraştırıp, köy, qasaba ve şeerlerni birer-birer dolaşmağa ve bundan soñ Aqmescitke kelip, esas tedbirlerge qoşulmağa yasaq etip olamay», – dey teşkiliy komitetiniñ azası Dilâver Akiyev.

Qırımtatar Bayraq künü bayramı munasebetinen iyün 26 künü Kiyev ve Tbiliside tedbirler teşkil etilecek.

XS
SM
MD
LG