Ukraina prezidenti Petro Poroşenko hatırlata, yekâne devlet tili olaraq ukrain tili qala.
«Ukrainanıñ yekâne devlet tili ukrain tili edi, bar ve olacaq», – dep ayttı Kiyevde yerli idare organları ve devlet akimiyet organlarınıñ vekilleri toplaşuvında prezident, haber ete Azatlıq Radiosı.
Onıñ aytqanına köre, qararlarnı qabul etüv boyunca vekâlet ve mecburiyetlerni akimiyetniñ merkezinden diger teşkilâtlarğa avuştıruv til ve medeniyet saalarına da tesir etecek.
«Yerli cemiyetlerniñ ukrain tilinen bir derecede diger tillerni de, şu cümleden rus tilini qullanmaq aqqı bar», – dep qayd etti devlet yolbaşçısı.
Onıñ aytqanına köre, yarın Ukraina Yuqarı Radasında Avropa Şurasınıñ Venetsiya komissiyasına yollanılacaq akimiyetniñ vekâletlerni merkezden diger teşkilâtlarğa avuştıruvnen bağlı Anayasa deñişmelerini kirsetüv aqqında qanun leyhası qayd etilecek.
Onıñ qayd etkenine köre, Esas qanunğa deñişmelerni kirsetüv aqqında qanun leyhası vilâyet ve rayon devlet memuriyetlerini yoq etecek ve prezident temsilcileri vazifelerini kisretecek. Bunıñnen beraber, devlet akimiyetiniñ yerli işini alacaq yerli şuralarnıñ icra komitetleri meydanğa ketirilecektir.
Prezident Yuqarı Rada kelecek afta Anayasa deñişmelerini birinci oquvda qabul etecek degen ümütte.
