Federatsiya Şurası tarafından Ukrainada Rusiye ordusını qullanmaq ruhsetiniñ lâğu etilmesi Rusiye prezidentini Ukrainağa ordularnı kirsetmek aqqından marum qaldırmay.
2009 senesiniñ soñunda o vaqıt prezident olğan Dmitriy Medvedev Federatsiya Şurasından çetelde silâlı quvetlerni qullanmaq müddetsiz aqqını qazandı, dep yaza Vedomosti.
Federatsiya Şurasınıñ anayasa qanunları ve devlet qurulışı komitetiniñ reis muavini Konstantin Dobrıninniñ aytqanına köre, o ruhset lâğu etilmedi, lâkin onıñ lâğu etilmesi de kerekmey. Şimdi vaziyet «bam-başqa», dep qayd ete neşir.
Rusiye Anayasasına köre, prezidentke diger memleketlerge ordu kirsetmek qararınıñ lâğu etilmesi kerekmey. Böyle bir qarar lâğu etilmesiniñ yekâne manası onıñ qabul etilmesiniñ sebebi olğan şaraitlerni yoq etüvdir, daa doğrusı – Ukrainada muzakere esnasınıñ başlanmasıdır, dep qayd etti Dobrınin.
Neşirniñ Rusiye mudafaa Nazirligine yaqın olğan menbasınıñ bildirgenine köre, 2009 senesi Medvedev tarafından elde etilgen ordularnı kirsetmek ruhseti çalışmağa devam ete.
Hatırlatamız, iyünniñ 25-de Federatsiya Şurası Ukrainada Rusiye ordusını qullanmaq ruhsetini lâğu etti. Lâkin Ukraina tış işler Nazirligi mında «kerçek bir areketler» olmağanını qayd etip, bu adımda memleket şarqında zıddiyetni yoq etmek azırlığını körmedi.
