Kiyevdeki qırımtatarlar cemiyeti ve cemaat faalleri iyünniñ 26-da Kiyevde Qırımtatar bayraq Kününi qayd etmege planlaştıralar. Tedbir Sofiyskaya meydanında saat 19:00 ötkerilecek.
Programmağa binaen, Ukraina ve qırımtatar gimni icra etilgen soñ, milliy bayraqnı tantanalı sürette açmağa planlaştıralar. Tedbirge rejissör ve «Haytarma» filminiñ baş qaramanı – Ahtem Seitablayevni davet ettiler. Aliye İbragimova qırımtatar bayrağınıñ tarihınen qısqadan tanış etecek. Ukrain ve qırımtatar yırcısı, nam qazanğan artist Lenara Osmanova çıqışta bulunacaq.
Bayram soñunda şeerniñ merkezinde motoyürüş ötkerilecek. Er kes davet etile. Aktsiyağa malümat ve teşkiliy ceetten «Krım SOS» cemaat teşebbüsi ve «Kiyevdeki qırımtatarlar cemiyeti» CT qol tuttılar.
Qırımda Meclis Qırımtatar bayraq Kününi «Borçoqraq» («Fontanı») qasabasında keçirecek. Yerli «akimiyetniñ» yasaqlarına baqmadan, avtoyürüş ötkerilmesi beklenile. Mecliste qayd etkenlerine köre, onıñ iştirakçilerini kene de para cezası bekley.
Aqmescit şeer şurası Mecliske bu bayramnı şeer merkezinde qayd etmege yasaq etti.
Bundan evel yarımadada iyünniñ 6-na qadar bütün tedbirler, şu cümleden mayısnıñ 18-de Qırımtatar sürgünligi qurbanlarınıñ hatıra Künü yasaq etilgen edi.
İlk sefer Qırımtatar bayraq Kününi 2010 senesi iyünniñ 26-da Aqmescitteki Lenin meydanında keçirgen ediler.
