Federatsiya Şurası iyünniñ 25-de olıp keçken toplaşuvda Ukraina territoriyasında Rusiye Federatsiyasınıñ Silâlı Quvetlerini qullanmaq ruhsetiniñ lâğu etilmesine qol tuttı. Bu qararğa 153 senator rey berdi, 1 – qarşı çıqtı, dep haber ete Azatlıq Radiosı.
Böylece, senatorlar Rusiye prezidenti Vladimir Putinniñ qararına qol tuttılar.
Malüm ki, Putin Federatsiya Şurasına Ukrainada Rusiye ordusını qullanmaq ruhseti aqqında 2014 senesi martnıñ 1-ne ait qararnı lâğu etmege rica etti.
Rusiye prezidentiniñ bildirgenine köre, Ukrainada barışıq esnasınıñ başlanması içün şaraitler yaratılması onıñ içün müimdir.
Ukraina prezidenti Petro Poroşenko Putinniñ bu teşebbüsini Ukrainanıñ şarqiy regionlarında vaziyetni al etüv tedbirlerinde birinci faydalı adım dep adladı.
