Lugansk vilâyetiniñ Antratsit şeeri civarında separatistler ATO quvetleriniñ blokpostına qarşı ateş açtılar, Kramatorsk civarında ise ukrain arbiylerine yaqınlaştılar.
Bunı arbiy-siyasiy tedqiqler Merkeziniñ reberi Dmıtro Tımçuk bildirdi, dep haber ete Azatlıq Radiosı.
Keçken afta Ukraina prezidenti Petro Poroşenko ukrain arbiyleriniñ iyünniñ 27-ne qadar bir taraflı ateş toqtatılmasını ilân etti. İyünniñ 23-de Donetskteki mesleatlardan soñ separatistler barışıqqa qol tutqanlarını bildirdiler, lâkin iyünniñ 24-de Slavânsk civarında Ukraina Silâlı quvetleriniñ arbiy vertolötı tüşürildi, doquz arbiy elâk oldı.
Prezident Poroşenko ateş toqtatılmasınıñ müddeti belgilengen vaqıttan evel lâğu etilmesi mümkünligini red etmey.
