Qırımtatar Milliy Meclisi Qırımtatar milliy bayraq Kününiñ nasıl etip qayd eteceklerini aydınlattı. Yerli «akimiyetniñ» yasağına baqmadan, avtoyürüş ötkerilmesi planlaştırıla. Onıñ iştirakçilerini kene de para cezası beklemesi mümkün.
Bunı Qırımtatar Milliy Meclisiniñ kâtibiyet yolbaşçısı Dilâver Akiyev Facebook saifesinde bildirdi.
«Bu sene teşkilâtçılarğa yürüş yolunı belgilemediler, onıñ içün maşinalar kolonnalarnen ketse, yañı cezalar olması mümkün, – dep tenbiyeledi o. – Lâkin! İç bir kimse maşinanı bayraqlarnen yaraştırıp, köy, qasaba ve şeerlerni birer-birer dolaşmağa ve bundan soñ Aqmescitke kelip, esas tedbirlerge qoşulmağa yasaq etip olamay. Qırım boyu bizim bayraqlarımız yelpireycek!».
Böyleliknen, tedbirler programmasına binaen, esas merasimler Aqmescitteki «Borçoqraq» («Fontanı») qasabasında qurulayatqan mektep meydanında keçirilecek. Mında bala resimler yarışı, foto yarış, yemek yarışı, dekorativ-ameliy sanat ustalarınıñ tedbiri, sport tedbirleri, «Bilgi quveti» kvesti, çölmekçilik boyunca ustazlar tedbiri, em de kontsert ötkerilecek.
«Tedbirlerimiz keçirilecek yer qoralanacaq ve kirişlerde metallodetektorlar qoyulacaq. Yasaq etilgen şeylerni ketirmege olmay. Şu cümleden sançqan, kesken şeyler, cam şişesinde suv ve ilâhre», – dep añlattı Akiyev.
İşğal etilgen Qırımda Meclis iyünniñ 26-da Aqmescitteki Trenöv bağçasında keçirecek olğan Qırımtatar bayraq Kününi yasaq etip, bağçanı ziyaret etken «yüzlernen balalarnıñ» havfsızlığını imaye etip olamayıq, dep bildirdiler. Bunıñnen beraber, Qırımtatar milliy bayraq Kününe bağışlanğan avtoyürüşni yasaq ettiler.
Şeer şurasınıñ resmiy cevabında aytıla ki, «avtoyürüşte iştirak etecek maşinalar sayısı (115) iş vaqtında yolcular içün qıyınlıqlarğa yol bere bile ve olarnıñ aq-uquqlarını bozması mümkün».
Bir sıra yasaqlardan soñ, iyünniñ 23-de Aqmescitte keçirilgen matbuat konferentsiyasında Qırımtatar Milliy Meclisiniñ reisi Refat Çubarov bildirdi ki, Qırımtatar milliy bayraq Kününe bağışlanğan tedbirler, Aqmescit akimiyetiniñ yasağına baqmadan, keçirilecek. Olar «Kosmos» kinoteatriniñ meydanında ötkerilmesi mümkün.
Bundan evel yarımadada iyünniñ 6-na qadar bütün tedbirler, şu cümleden mayısnıñ 18-de Qırımtatar sürgünligi qurbanlarınıñ hatıra Künü yasaq etilgen edi.
