Ukraina ükümeti vaqtınca işğal etilgen territoriya ve terrorizmge qarşı tedbirler keçirilgen yerlerden köçip kelgenlerniñ içtimaiy teminlevi meseleleri boyunca koordinatsion ştabını qurdı, dep haber ete İnterfaks-Ukraina.
Ştab yolbaşçısı Ukraina fevqulâde vaziyetler Devlet hızmetiniñ yolbaşçı muavini olacaq.
Ştab faaliyetiniñ teminlevinen Ukraina fevqulâde vaziyetler Devlet hızmeti oğraşacaq, merkeziy ve yerli akimiyet organlarına köçip kelgenler yerleştirilecek devlet ve kommunal mülkiyetine ait obyektler aqqında malümat berilmesi buyurıldı.
Bundan ğayrı, Nazirler şurasınıñ buyruğında qayd etile ki, terrorizmge qarşı tedbirler keçirilgen yerlerde terroristik faaliyetine alâqası olğan vatandaşlarnı belgilemek içün tranzit noqtalarnı meydanğa ketirecekler.
Ükümet İçtimaiy siyaset Nazirligine köçip kelgenlerniñ cedvelini tizip, bunıñ kibi vatandaşlarnıñ içtimaiy teminlevi boyunca yekâne malümat bazasını açmağa avale etti.
