Link açıqlığı

Bazı ukrain aliy oquv yurtları işğal etilgen Qırım studentlerini bedava oqutmağa istemeyler


Ukraina aliy oquv yurtları qırımlılarğa «Ukrainanıñ işğal etilgen territoriyasında vatandaşlarnıñ aq-uquqları ve azatlıq teminlevi aqqında» qanunğa köre tasil almağa imkân bere.

İşbu vesiqağa binaen, Qırımda añlaşma esasında oquğanlar devlet büceti parasına tasil ala bileler.

Lâkin uquq qorçalaycılar bildireler ki, er bir aliy oquv yurtı qanunğa riayet etmege azır degil ve Qırımda añlaşma esasında oquğanlarnı bücet yerlerine qabul etmey.

«Almenda» vatandaşlıq maarifçiligi Merkeziniñ gençler programmalarınıñ koordinatorı Ruslan Niçeporuk Qırım.Aqiqat saytına bergen malümatlarına köre, İ.Franko adına Lviv milliy universiteti oquş parasını ödemegen qırımlılarnı qabul etmeycegini bildirdi.

«Studentler qıyın bir vaziyetke oğradılar. Kelgende olardan imtianlar berilmesini talap ettiler ve qabul olunacaqlarını vade ettiler. Neticede olar imtianlarnı muvafaqiyetli berdiler, lâkin yalıñız bücet parasına oquğanlar qabul etildi. Añlaşma esasında tasil alğanlarğa ise oquş parası ödemegence qabul etmeyceklerini bildirdiler», – dedi Niçeporuk.

Ukraina tasil ve ilim naziri Serğiy Kvit bildirdi ki, onıñ yuqarıda añılğan vaqialar aqqında haberi de yoq. Onıñ aytqanına köre, nazirlik bunıñnen bağlı bir de bir şikâyet almadı.

«Qırım studentleri oquş yılınıñ soñuna qadar para tölememek kerekler. Olarnıñ oquşnı bedava yekünlemege aqqı bar. Em de bu studentler Qırımda oquğanda para tölegen ediler. Onıñ içün olar eki kere para tölememek kerekler», – dep ayttı Qırım.Aqiqatqa Serğiy Kvit.

O, bücet parasına oqumağa imkânından marum qaldırılğan qırımlılarnı bunı nazirlikke bildirmege tevsiye etti.

XS
SM
MD
LG