OMV Avstriya energetik şirketi ve Rusiyeli «Gazprom» şirketi Ukrainadan keçmeyip, Avropanı gaznen temin etmege imkân berecek «Cenübiy aqım» («Yujnıy potok») borusınıñ Avstriya qısmınıñ qurması aqqında añlaşma imzaladılar, dep haber ete Azatlıq Radiosı.
Vesiqa iyünniñ 24-de Venada Rusiye prezidenti Vladimir Putin ve Avstriya prezidenti Heinz Fischerniñ «Cenübiy aqım» ve Ukrainadaki vaziyet muzakere etilgen körüşüvinden evel imzalandı.
Avropa komissiyası «Gazprom» ile bu leyha boyunca imzalanğan añlaşmalar Avropa Birliginiñ raqiplik qaidelerine uymağanını qayd etip, Avropa Birligi devletlerini Kremlniñ bu leyha boyunca tesirine qarşı çıqmağa çağırğan edi.
OMV bildire ki, işbu leyha Avropağa energetik taşımalarnıñ havfsızlığını pekitecek.
Tünevin Venada Vladimir Putin bildirdi ki, «Cenübiy aqım» – Ukrainadan keçmemek ıntılışı degil. «Biz yalıñız transport infrastrukturasını inkişaf ettiremiz», – dep añlattı Rusiye prezidenti.
«Cenübiy aqım» Qara deñiz, Sırbistan ve Macaristan, em de yaqında borunıñ öz qısmında işni toqtatqan Bulğaristandan keçmek kerek.
İyünniñ 24-de Rusiye energetika naziri Aleksandr Novak dedi ki, Bulğaristan qısmı ile bağlı problemlerni al etmek içün muzakereler keçirile.
