Qırım avto taşıyıcıları yolcu taşuvlarınıñ fiyatlarını Krasnodar diyarınıñ seviyesine qadar kötermek kerekligi aqqında ilân ettiler.
Bunı Qırım «Avto taşıyıcılarnıñ birleşmesi»niñ prezident muavini Zinoviy Ludçak bildirdi, dep haber ete Qırım «akimiyetiniñ» ruporı Krıminform saytı.
«Qırımda yolcu taşuvlarınıñ fiyatı Ruside olğanına köre, eki qat ücüzdir. İçtimaiy standart seviyesiniñ köterilüvini köz ögümizge alıp, altı ay devamında fiyatlarnı Krasnodar diyarında olğanına kötermege kerek dep tüşünemiz»,– dedi Ludçak.
Bundan da ğayrı, Qırım avto taşıyıcıları Rusiye baş naziri Dmitriy Medvedevge olarnı bergilerniñ bir qaç çeşitinden boşatmağa rica etmege niyetindeler.
«İyül 1-ne qadar baş nazirge yolcu naqliyat şirketlerini NDS, kelir bergisinden boşatmaq içün rica mektübini yollamağa kerek», – dedi o.
Ludçak şunı da qayd etti ki, muracaatta fiyatlarnıñ köterilüvi ve imtiyazlı yolcularnıñ taşuvı içün tazmin ödeviniñ temin etüvi aqqında ricalar olacaqtır.
