Aqmescit rayonınıñ Bulğanaq köyünde hafizler medreseniñ müdir muavini Ayder Osmanovnı bir qaç saatten soñ yolladılar, dep bildire Qırım.Aqiqat mühbiri.
Qırım.Aqiqat bergen malümatına köre, oquv yurtında beş saat devam etken tintüvden soñ, ocanı Qırımnıñ İçki işler nazirliginiñ baş idaresine alıp kettiler, mında onı bir buçuq saat devamında sorğudan keçire ediler. Bundan soñ, islâm oquv yurtından şekli bir şey tapılmağanı aqqında bildirip, azat ettiler.
Hatırlatımız, İyün 24 künü saba saat 6:30 Aqmescit rayonınıñ Bulğanaq köyünde oğlanlar içün hafizler medresesine belgisiz şahıslar sürip kirdi ve tintüvni keçirmege başladı. Medresede 13 talebe ve eki oca buluna edi. Er kes yuqlay edi.
«Berkut» hadimleri kiriş qapı ve pencereni qırıp, içeri kirdiler. İç bir vesiqa ya da mahkeme qararını köstermediler. Tintüvni tahminen 30 insan keçire edi.
Binanıñ içinde olğan er şeyni, edebiyatnı, bala şeylerini baqıp çıqtılar, talebelerden telefonlarını tutıp aldılar. Tintüv soñuna yetkende, oquv yurtından müdir muavini Ayder Osmanovnı ve bir qaç bilgisayarnı alıp kettiler. Tintüv beş saat devam ete edi.
Medreseden ğayrı silâlı insanlar tintüvler ile qırımtatar ailesine de sürip keldi.
