Qırımnıñ uquq qoruyıcı organları ve Fevqulâde vaziyetler boyunca nazirligi Aqmescitte maşna patlavı aqqında malümatnı red ete.
«Bugün Aqmescitte iç bir patlav yoq edi», – deyler Qırımnıñ Fevqulâde vaziyetler boyunca nazirliginiñ matbuat hızmetinde.
Vaqia yüz bergen yerge kelgen Qırım.Aqiqat mühbirine yerli sakinler adiseniñ bir qaç variantını tarif etti. Birevleri patlav olğanına israr ete edi, digerleri ise yolda qaldırılğan qırmızı tüste «Jiguli» maşnasında olğan şekli torbalar şübe doğurğanını aytalar. Variantlardan daa birisi – böyleliknen, yerli FSB terroristlerge qarşı ameliyatı boyunca talimatını keçire eken.
Faqat patlav aqibetlerini jurnalistler körmedi.
Aynı zamanda Qırım «içki işler nazirligi»nde şübeli avto aqqında bildirüv bar olğanını aytalar.
«Bizge diqqatlı sakinler telefon açıp, Aqmescit soqağında saibi olmağan avto turğanını ayttılar. Tabiiy ki, uquq qoruyıcılar areket etmege başladı – mahsus hızmetler barıp, maşnanı teşkerdi, yahşı ki, er şey güzel, bir şey tapılmadı»,– deyler Qırım.Aqiqatqa Qırım «içki işler nazirligi»nde.
Mında şunı da qayd ettiler, al-azırda maşnanın saibini belgilemege tırışalar.
Bugün saba Aqmescitniñ sakinleri caddelerden birisinde patlav olğanı aqqında haber ettiler. Bu sebepten maaleni OMON, Fevqulâde vaziyetler boyunca nazirliginiñ hadimleri, politsiya sarıp aldı.
