Qırım «parlamentiniñ» spikeri Vladimir Konstantinov icra akimiyet memurlarına avgust ayına qadar yarımadada ukrain ve ingliz tillerinde yol işareteriniñ sayısını azlaştırmağa teklif etti.
Bunı o salı künü Qırım nazirler Şurası toplaşuvında bildirdi, dep haber ete Qırım.Aqiqat mühbiri.
«Bir ay devamında bütün yol işaretlerini bir nizamğa ketirmek kerek. Mesele nede? Mesele şunda ki, bizde ukrain ve ingliz tillerinde işaretlerniñ sayısı pek büyük. İngliterede bu kibi işaretni ingliz ve rus, ya da Lvovda rus ve ingliz tillerinde tapa bilirmiz dep tüşünmeyim. Öz-özümizni ürmet etmelimiz ve yazılarnı bir tertipke ketirmelimiz. Ukrain tiline qarşı degilmiz, amma inglizlerge mında yer yoq! Olarnıñ bizge olğan «sevgi»sini epimiz bilemiz», – dedi Konstantinov.
Qırım «baş naziri» Sergey Aksönov bu mesele boyunca avaleni azırlamağa rica etti.
