Link açıqlığı

Aqmescit rayonınıñ Bulğanaq köyünde medreseniñ tintüvi bitti. Oquv yurtından müdir muavini Ayder Osmanovnı ve bir qaç bilgisayarnı alıp kettiler.

Bunı Qırım musulmanları diniy idaresiniñ matbuat hızmeti bildire.

«Al-azırda tintüv soñuna yetti. Binada olğan er şeyni, bala şeylerini de baqıp çıqtılar. Şekli bir şey tapmadılar, – deyler matbuat hızmetinde. – Bir qaç bilgisayarnı ve medrese müdiriniñ muavini Ayder Osmanovnı alıp kettiler. «Berkut» yazıları ile kamuflâj urbasına kiyngen insanlar özlerini Rusiye Federatsiyasınıñ FSB hadimleri olaraq tanıttı. Öz areketlerini añlatmadılar».

Qırım musulmanları diniy idaresiniñ matbuat hızmeti bergen malümatına köre, «Berkut» hadimleri medresege kelgen vaqıtta, balalar yuqlay edi. Oquv yurtına hızmetniñ 30 hadimi kirdi. Tintüv neticesinde qapı ve pencereler qırıldı.

Saba saat 6:30 belgisiz şahıslar Bulğanaq köyüniñ medrese müdiriniñ muavini yaşağan evinde de qapını qırıp taşladı. O vaqıt evde Ayder Osmanov, qadını ve eki balası (qızı – 4 yaşında, oğlu – 11 aylıq) buluna edi.

​Vaqia yerine saba yerli Meclis reisi Aziz Sadıkov kelgen edi. Onı, balalarnıñ havfsızlığını köstermek içün, medresege kirsetken ediler.

Tintüv 5 saat devam etti: saat 6:30 saat 11:30-ğace.

İyün 24 künü saba saat 6:30 Aqmescit rayonınıñ Bulğanaq köyünde oğlanlar içün hafizler medresesine belgisiz şahıslar sürip kirdi ve tintüvni keçirmege başladı. Bundan evel, saat 6:00 kamuflâj ve adiy urbağa kiyingen 20 silâlı insan qırımtatar qorantasınıñ evine de tintüv ile kelgen edi.

XS
SM
MD
LG