Qırımnıñ sabıq baş naziri Anatoliy Mogilöv Ukrainada yaşay ve siyasiy faaliyetini devam etmege istemey.
Bunı o Qırım.Aqiqatqa bildirdi.
«Nefaqаdam şimdi, raatlanam. Mende er şey yahşı. Qırımğa yalıñız raatlanmaq içün baracağım»,– dedi Mogilöv.
Bunıñ ile sabıq baş nazir Ukrainanıñ qaysı yerinde yaşağanını qayd etmedi. Memleketteki bugünki vaziyetine olğan fikrini de bildirmedi. Bulunuv yeri aqqında sualge cevap berip, trubkasını qoydı, başqa bağğa çıqmadı.
Mogilövnıñ öz bulunuv yeri aqqında tarif etmemek istegini Qırım.Aqiqatqa Ukraina halq deputatı, Qırım içki işler nazirliginiñ sabıq başı Gennadiy Moskal añlattı.
«Onı Rusiyeniñ mahsus hızmetleri qıdıra. O, Qırımnıñ işğali aqqında haberdar edi. Moskvağa barıp, buña imza qoyğan edi. Memuriy binalarnı zapt etkende, o, bunı bile edi. Anda evelden yataq, mahsulat, aşçı, silânı ketirgen ediler. Bunıñ episi o vaqıttaki Qırım akimiyeti ile añlaşılğan edi. Er şey zapt etilgende, o qorqtı ve qaçıp ketti»,– dey Moskal.
Moskalniñ malümatına köre, Rusiye Federatsiyası şimdi Qırımnıñ sabıq baş nazir muavinlerini Pavel Burlakov ve Georgiy Psarövnı da qıdıra eken. Ekisi de Makeyevkadan çıqqanlar. Şimdi bulunuv yerleri belgisizdir.
Siyasetşınas Aleksandr Formançuknıñ fikrince, Burlakov yarımdağa müim vazifege başlamağa imkânını saqlay eken.
