Link açıqlığı

Cemaatçılar Poroşenkonı mecburen köçip kelgenler aqqında qanunğa imza qoymamağa çağıra


Cemaatçılar Ukraina prezidentini «Qırım Muhtar Cumhuriyetiniñ ve Aqyarnıñ vaqtınca işğal etüvi ve Ukraina territoriyasında terriroistlerge qarşı ameliyatınıñ keçirilüvi sebebinden mesken yerlerini terk etmege mecbur olğan şahıslarnıñ uquqiy statusı aqqında» qanun leyhasına imza qoymamağa çağırdılar.

Prezidentke muracaatnı Ukrainanıñ sekiz belli uquq qoruyıcı teşkilâtlarınıñ yolbaşçıları imzaladı.

Uquq qorçalayıcılarnıñ sözlerine köre, Yuqarı Şura bozuluvlar ile qanun leyhasını qabul etti. Qanun leyhası ukrainlilerniñ aqlarını boza.

«Qanun leyhası cemiyet muzakereleri ve mütenasip teşkerüvler olmağan vaqıtta, bir toplaşuv devamında qabul etildi ve onıñ manası boyunca bayağı şübe bar», – denile beyanatta.

Uquq qoruycılar şunı da qayd eteler ki, «mecburiy migrant» tarifi halqara qaidelerge uymay. Bundan da ğayrı, qanunda qayd etilgeni kibi, territoriyanı terk etken vatandaşlar olarnıñ köçip kelgeni mecburiy olğanını isbatlamaq kerek eken.

«Vatandaşlarğa mecburen köçip kelgen statusınıñ berilmesini sadeleştirmek yerine, devlet işbu qanun leyhası ile bu ketişatnı aksine qıyınlaştıra»,– deyler uquq qoruyıcılar.

Qanun leyhasınıñ 2 ve 3 qısımlarında olğan noqtalar diger memlekette qaçaq statusını alalmağan ukrainlilerni Ukrainada köçip kelgen statusını almaq aqqından marum qaldıra bile. Bu ise, öz nevbetinde, işbu vatandaşlarnıñ aqlarını boza bile, deyler muracaatta.

İşbu qanun leyhasını Ukraina Yuqarı Şurası iyün 19 künü qabul etti. Prezident onı daa imazalamadı.

XS
SM
MD
LG