İyün 24 künü saba saat 6-da kamuflâj ve adiy urbağa kiyngen tahminen 20 silâlı insan pencerege taqırdatıp, Aqmecsit rayonınıñ Bulğanaq köyünde yaşağan qırımtatar qorantanı uyattılar.
Bunı Qırım musulmanları diniy idaresiniñ matbuat hızmeti bildire.
Matbuat hızmetiniñ malümatına köre, belgisiz şahıslar ömür arqadaşlar ve 3 bala bulunğan evge sürip kirdiler. Aile yuqlay edi. Belgisiz şahıslar evniñ tintüvini keçirdiler.
«Mağaz, çardaq, er bir odanı, bala şeylerini, edebiyatını baqıp çıqtılar», – dey üç balanıñ anası.
Ailege afyon ve silânı qıdırğanlarını bildirdiler. Tintüv üç saat devam etti: saat 6-00 saat 9:00-ğace. Bundan soñ aileni yerli hafizler medresesine ozğardılar. Sebepni añlatmaylar.
Evel Qırım Müftiyatı iyün 24 künü belgisiz şahıslar Bulğanaq köyünde talebeler bulunğan medreseni zapt etip, anda tintüvni keçirmege başlağanını bildirgen edi.
Medrese müdiri Usniye Asanova bildirgenine köre, medrese binasına sürip kirgen belgisiz şahıslar – FSB hadimleridir.Tintüvniñ keçirilmesini mektep müdiri Dnepropetrovsk vilâyet memuriyetiniñ başı İgor Kolomoyskiy ve qırımtatarlarnıñ lideri Mustafa Cemilev arasında imzalanılğan añlaşma ile bağlay. Añlaşmada sanki Qırımda ekstremizm merkeziniñ peyda oluvı aqqında aytıla.
