Link açıqlığı

Aksönov muavinleriniñ sayısını arttırdı. Olarnıñ sırasınа «Qırım imayesiniñ» sabıq başı kirdi


Qırımnıñ öz başına tayin etilgen baş naziri Sergey Aksönov Qırım «akimiyeti»nin yañı terkibini taqdim etti, mında yañı «baş nazir muavinleri» peyda oldı.

Onıñ sözlerine köre, Rusiye qanunları daa da çoq vazifelerni kirsetmege imkân bergenine baqmadan, terkipte yalıñız eki yañı muavin olacaq. «Terkipni eyileştirmek içün vali apparatını teşkil etmemege qarar aldıq», – dep bildire Aksönovnıñ sözlerini Qırım «akimiyeti»ne yaqın olğan Krıminform saytı.

Neşirniñ malümatına köre, birinci «baş nazir muavini» şimdiki «baş nazir muavini» Mihail Şeremet olacaq. O, Rusiyege qoşuluvı aqqında «referendumnıñ» keçirilmesinden evel «Qırım imayesi»niñ başlığında tura edi.

«Muavinler» vazifelerini Nikolay Yanaki, Sergey Doniç, Ruslan Balbek ve Larisa Opanasük saqladılar.

Daa bir «baş nazir muavini» vazifesine Rustam Temirgaliyevniñ istifasından soñ iqtisadiy bölükni idare etken Yevgeniya Bavıkina tayin etilecek. Bundan da ğayrı «baş nazir muavini» vazifesine «içki siyaset, haber ve alâqa naziri» olğan Dmitriy Polonskiy ve Rusiye prezidenti yanında «Qırım Cumhuriyetiniñ daimiy temsilcisi» Georgiy Muradov başlaycaq.

Qırım «akimiyeti»nde öz vazifelerini «nazir»lerniñ çoqusı saqladı, amma bazı bölüklerniñ serlevalı deñişti.

«Maliye naziri» Vladimir Levandovskiy olacaq, «iqtisadiy inkişaf naziri» –Svetlana Verba, «medeniyet naziri» Vera Novoselskaya, «kurort ve turizm naziri» Yelena Yürçenko, «köy hocalığı naziri» Nikolay Polüşkin, «emek ve içtimaiy qoruv naziri» Yelena Romanovskaya, «tasil, ilim ve gençlik naziri» Natalya Gonçarova, «sport naziri» Georgiy Şestak, «sanayi siyaset naziri» Andrey Skrınnik, «qurucılıq ve mimarcılıq naziri» Vladimir Nikolov, «ekologiya ve tabiat resursları naziri» Gennadiy Narayev, «sağlıq saqlav naziri» Aleksandr Baharev oldılar. «Yaqarlıq ve energetika naziri» Qırım «parlamentiniñ» deputatı Sergey Yegorov oldı, «Adliye naziri» – Оleg Şapovalov. «Naqliye naziri» vazifesine Yuriy Şevçenko tayin etilecek.

Bu qararlar iyün 25 künü Qırım «parlamenti»niñ toplaşuvında tasdiqlanmalı.
XS
SM
MD
LG