Link açıqlığı

Matbuat vastaları: Donetskte iyün 27-siniñ sabasına qadar ateş toqtatılması aqqında añlaştılar


Donetskte memleket şarqında vaziyetni al etüv muzakerelerinde iştirak etken Ukrainanıñ ekinci prezidenti Leonid Kuçma bildirdi ki, taraflar iyün 27-siniñ sabasına qadar ateş toqtatılması aqqında añlaşıp oldılar.

Bunı o, muzakerelerden soñ brifingde bildirdi, dep yaza Ukrainskaya pravda.
«Bizler iyünniñ 27-si saba saat 10-ğa qadar eki taraflı ateş toqtatılması aqqında añlaştıq», – dep ayttı Kuçma.

Körüşüvde bulunğan OSCE vekilleri Donetsk vilâyetinde ğayıp olğan adamlarnı beraber qıdıracaqlarını bildirdiler.

«OSCE zıddiyetniñ barışıq al etilmesine qol tuta, lâkin bizim missiyamız havfsızlıqta olacağında emin olmaq kerekmiz», – dep bildirdi OSCE missiyasınıñ vekili.

Hatırlatamız, bazarertesi künü Donetskte Ukraina, Rusiye vekilleri ve separatistler arasında Ukrainanıñ şarqiy regionlarında vaziyetni al etüv muzakereleri başlandı.
Mesleatlarnıñ maqsadı – Ukraina prezidenti Petro Poroşenkonıñ barışıq planını yerine ketirüv basamaqlarını belgilemektir, dep bildire onıñ matbuat hızmeti.

Poroşenkonıñ avalesi ile Donetskteki muzakerelerde Ukrainanıñ sabıq prezidenti Leonid Kuçma iştirak ete. Moskvanı Kiyevdeki Rusiye elçisi Mihail Zurabov temsil ete.

Qırım.Aqiqat bergen malümatlarğa köre, iyün 27-de Ukraina Avropa Birligi ile assotsiatsiya Añlaşmasını imzalamaq kerek.
XS
SM
MD
LG