Link açıqlığı

Mecliste Qırımtatar bayraq Kününi keçirmek içün yer taptılar


Aqmescit akimiyetiniñ qararına baqmadan, Qırımtatar bayraq kününe bağışlanğan tedbirler episi bir olacaq. Olar Qırım paytahtınıñ merkezinde «Kosmos» kinoteatri ögündeki meydanda keçirile bilecek.

Bunı bugün Aqmescitte matbuat konferentsiya devamında qırımatatar milliy Meclisiniñ reisi Refat Çubarov bildirdi, dep haber ete QHA.

Çubarovnıñ sözlerine köre, tedbirniñ teşkilâtçıları Bayraq Kününi «Kosmos» kinoteatri ögündeki meydanda keçirmek içün arizanı şeer şurasına yollağanlar. Bundan da ğayrı, o, bugün Qırımtatar bayraq kününiñ keçirilmesi boyunca teşkiliy komitetiniñ toplaşuvı olacağını qayd etti, mında tam qarar alınacaq.

«Aqmescit şeer şurası işbu tedbirni iyün 26 künü Aq-Meçet mikrorayonında keçirmege teklif ete. Şimdi vaziyet böyledir, tedbirge bir qaç kün qalğan vaqıtta, teşkilâtçı ve iştirakçiler onıñ keçirilecek yerini bilmeyler», – dep bildire Çubarovnıñ sözlerini Qırım «akimiyeti»niñ rupororı Krıminform saytı.

Neşir şunı da bildire ki, Meclis yolbaşçılığı numayışnı şeerniñ merkezinde keçirmege ümüti ile Aqmescit akimiyetinen muzakerelerni devam ete eken.

«Menimce, iyün 26 künü Qırımnıñ er bir yer ve rayonında bu tebir Qırım cemiyeti içün «körüngen şekilde» keçecektir», – dedi Çubarov.

Bunıñ ile beraber, o, tedbirler qanunlarğa köre keçirilecegini de aytıp keçti.

Qırım.Aqiqat saytı bergen malümatına köre, Qırımtatar bayraq Kününi Aqmescit merkezinde «Russkaya obşçina» teşkilâtınıñ tedbirlerinden sebep keçirmege yasaq ettiler.
XS
SM
MD
LG