Link açıqlığı

Avropa Birliginiñ Şurası assotsiatsiya Añlaşmasınıñ maddelerini bu küzde, vesiqa Ukraina Yuqarı Radası tarafından tasdiqlanğan soñ, qullanmağa imkân bergen qararnı qabul etti.

UNİAN malümatına köre, böyle bir qarar Luxembourgda Avropa Birligi Şurasınıñ tış işler nazirleri körüşüvinde qabul etildi.

Bundan ğayrı, bugün Şura Ukraina ve Avropa Birligi arasında assotsiatsiya añlaşmasınıñ imzalanmasına tehnikiy azırlıqnı yekünledi. Neşirniñ malümatına köre, vesiqa iyün 27-de Avropa şurasınıñ toplaşuvı çerçivesinde Ukraina prezidenti Petro Poroşenko, Avropa Birligi Şurasınıñ prezidenti Herman Van Rompuy, Avropa komissiyasınıñ prezidenti José Manuel Barroso ve Avropa Birligi memleketleriniñ devlet ve ükümet yolbaşçıları tarafından imzalanacaq.

Ukraina prezidenti Petro Poroşenko Brüsselde Avropa Birligi ile assotsiatsiya Añlaşmasını kenişletüv ve eyi qomşulıq siyaseti işleri boyunca Avropa komissarı Ştefan Füle ile muzakere etti.

Hatırlatamız, Añlaşmanıñ siyasiy qısmı mart soñunda imzalanğan edi, kelecek cuma künü, iyün 28-de, Ukraina prezidenti Petro Poroşenko Brüsselge kelip, vesiqanıñ iqtisadiy qısmı altında qol qoyacaq.
XS
SM
MD
LG