Link açıqlığı

Saatnıñ esas haberi

«Rusiyeli» Qırımda musulman teşkilâtlarına qarşı informatsion cenkni başladılar


İşğal etilgen Qırımda musulman teşkilâtlarına qarşı informatsion cenkni başladılar.

Bu aqqında Qırım.Aqiqat neşirinde olğan «Alraid» Bütünukrain cemaat teşkilâtlarınınıñ birligi beyanatında aytıla.

«Alraid» teşkilâtınıñ malümatına köre, Rusiye kütleviy haber vastalarınıñ bunıñnen bağlı faaliyeti teşviqat kampaniyasına beñzey.

«Bu kampaniyanıñ maqsadı Qırım musulmanları Diniy idaresi ve yerli musulman cemiyetlerini yoq etip, musulmanlarnıñ kelişmegen liderlerini Rusiyege qol tutqan musulmanlarğa deñiştirmekten ibarettir. Qırımda olıp keçken matbuat konferentsiyasında Rusiyede İslâm dinine açıq-aydın qarşı çıqqan Roman Silantyevniñ iştirakini de qayd etmeli. O, İslâm dinine qarşı bir çoq şeylerni seslendirdi ve musulmanlarnı radikalizmde qabaatlap, belli oldı», – dep aytalar teşkilâtta.

Qırımda bu adam Rusiyeniñ eñ büyük ve itibarlı diniy teşkilâtlarından biri – Rusiye müftiler Şurasını terroristlernen iş tutqanında qabaatladı. Qayd etilgeni kibi, Şura yolbaşçısı şeyh Ravil Gaynutdin, em de musulman vaizi Şamil Alâutdinov aprel ayında Qırımnı ziyaret ettiler. Ziyaretniñ esas maqsadlarından biri QMDİ müftisi Emirali Ablayev ile körüşüv oldı.

«Böyleliknen, Rusiye Federatsiyasınıñ körümli musulman liderleri Qırımdaki eñ nufuzlı musulman birligi ile işbirlik yapmağa azır olğanını bildirdiler. Aynı vaqıtta, Qırım ve ondan tış ayrı küçleri yarımadada öyle de peyda olmağan «Pravıy sektor» vekilleri yerine yañı duşman sıfatını yaratacaq olalar. Aynı usullar qullanıla: cemiyetni idare etüv, açıq yalan, kerçek yerine yañlış malümat», – aytalar teşkilâtta.

Cemaatçılar qayd eteler, Ukrainada bir de bir diniy teşkilâtqa mensüp olğanına köre cemiyetler yasaqları olmadı. Em de yasaq etilgen musulman ya da hristian edebiyat cedvelleri olmadı. Yerli ve regional derecede problemler olsa da, diniy teşkilâtlar inkişaf ete ve menfaatlarını ömürge keçire ediler. Aynı böyle siyaset cemaat teşkilâtlarına nisbeten de alıp barıla edi.

Ayrı vaqialarğa baqmadan, Ukrainada dinlerara ve milletlerara sebeplerden zıddiyetler olmağan edi. Ukrainada etnik dağıtuv, millet mesüpligi boyunca taqipler, gizli «İslâm» teşkilâtları kibi şeyler qayd etilmegen edi.

Bundan sebep diniy ve cemaat musuman teşkilâtları ukrain cemiyetiniñ eşqı oğrunda çalıştılar. Bir çoq musulman cemiyetleri öz printsipleri ve Ukrainağa qol tutqanları sayesinde cemiyette istiqrar ve dinlerara barışıqnıñ müim faktorı oldılar.

«Qırım musulmanları Diniy idaresi «Alraid» Bütünukrain birligi ve diger teşkilâtlar ile beraber soñki 15 yıl devamında farqlı din vekilleri arasında eyi munasebetler olması içün faal areket ettiler. Şu cümleden Qırım yarımadasında da. Bu teşkilâtlarnı sahte mütehassıslar, jurnalistler ve siyasetçiler içün yamanlamaq ıntılışları olğan edi», – bildirdiler teşkilâtta.

«Alraid» işğal etilgen Qırımda diniy teşkilâtlarnıñ itibarını bozmaq ıntıluvları bar olğanını qayd etti.
XS
SM
MD
LG