Mında yerleşken caminiñ minaresini 1930-ıncı seneleri yoq ettiler. 1994 senesi ise belgisiz şahıslar cami binasını yaqtılar.
Qırım musulmanları Diniy idaresiniñ matbuat hızmeti bildire ki, yañıdan tiklenilgen cami selçük şeklinde quruldı. Cami quruluşınıñ parasını Türkiyedeki iş adamı, tamırları Qırımdan olğan Murat Ülker ödedi. Murat Ülker Körbek camisiniñ evelki imamı Devlet hacı İslâmnıñ torunı ola. İmam Devlet hacı İslâm Körbek camisinde 1933 senesine qadar diniy hızmet etti. Repressiya zamanında ise Türkiyege köçip ketti.
Crimea Alushta, Izobilnoe
Qırımnıñ eñ güzel camilerinden biri olğan Körbek camisiniñ tantanalı açılış merasimine yarımadanıñ çeşit köşelerinden musafirler keldi. Qırım müftisi hacı Emirali Ablayev musulmanlarnı bu emiyetli bir vaqia ile hayırlap, yerli çoqmilletli sakinlerni birlik-beraberlikte muabbet yaşamağa çağırdı, çünki İslâm dini butün insanlıq içün hızmet etken bir dindir.
Qırımtatar milliy meclisiniñ reisi Refat Çubarov qırımtatarlarnı temsil etken organnıñ adından yerli din cemiyeti, Aluşta bölgesiniñ ükümeti ve sponsorlarğa teşekkürler bildirdi.
Aluşta şeer yolbaşçısı Stanislav Kolot ise bu hayırlı vaqia Qırım ealisiniñ, hususan qırımtatarlarnıñ, maneviy inkişafını aks etkenini qayd etti. Tantanalı merasimde Türkiye Cümhüriyeti diyanet işleri idaresiniñ koordinatorı Mevlüt Seyhan, yerli akimiyet, qırımtatar cemaatçılığı temsilcileri ve digerleri iştirak ettiler.
Merasim musafirleri yañıdan qurulğan camide Cuma namazını qıldı ve Qırımnıñ barışığı ve inkişafı içün dua ettiler.
Hatırlatamız, Körbek camisiniñ quruluşı 2013 senesi mayıs ayında başlandı. Binanı qurmaq içün sırf mermer ve siyrek rastkelgen ağaç qullanıldı. Bina 500 adamnı sığdıra bile. Birinci qatta imam odası, oğlanlar içün medrese ve yataq odası, sınıflar, aşhane ve eki abdesthane (erkekler ve qadınlar içün) yerleştirilgen. Ekinci qatta buyük ibadethane ve qadın-qızlar içün ayırılğan yer bar. İbadethane Quran süre ve ayetlerinen yaraştırılğan. Qayd etmek kerek ki, camideki butün arap yazıları, mihrab ve kiriş altın ile boyalanğan.
Eñ yaqın zamanda Körbek camisindeki erkek medresesine talebelerni qabul etmege başlaycaqlar. Bundan da ğayrı, qadın-qızlar içün İslâm dininiñ esasları boyunca kurslar açılacaqtır.
