Link açıqlığı

Bağçasarayda Qırım camileriniñ unikal fotoresimler sergisi çalışa


Bağçasaraydaki Zıncırlı medrese binasında «Qırım camileri: Özbek camisiniñ 700 yıllığı munasebeti ile» sergisi açıldı.

Qırım.Aqiqat mühbiriniñ malümatına köre, sergide Bağçasaray tarihiy-medeniy qoruğınıñ fondları ve Rusiye ilimler Akademiyası arhivlerinde olğan Qırım camileriniñ XX asırnıñ 20-nci senelerine ait fotoresimleri numayış etilgen.

Qoruq hadimi Rustem Eminovnıñ aytqanına köre, sergi açmaq ğayesi bir buçuq yıl evelsi Moskvada alim-şarqşınas İlya Zaytsev ile Eski Qırımda keçken asırnıñ başlarında Özbek camisi ve medresesiniñ qazma işlerinde reberlik yapqan ve olarnı fotoğa çıqarğan Borozdin Fondunda beraber çalışqan vaqıtta peyda oldı.

«XX asır başlarınıñ Qırım musulmanlarınıñ medeniy obyektler çeşitligini köstermek içün sergini Bağçasaray qoruğınıñ fotoresimlerinen toldurmağa qarar alındı. Mında bundan evel bir yerde numayış etilmegen unikal fotoresimler çoq», – dep tarif etti Rustem Eminov.

Rusiye alim-şarqşınası, şimdi Bağçasaray tarihiy-medeniy qoruğı müdiriniñ ilim boyunca muavini İlya Zaytsev jurnalistlerge bergen malümatına köre, sergi turistik mevsimniñ soñuna qadar çalışacaq. Soñra sergini Moskvağa avuştıracaqlar, em de Qırım camileriniñ fotoresimler katalogını yapacaq olalar.

Leyha Bağçasaray tarihiy-medeniy qoruğı, RAN arhivi (Moskva), «Marcani» Fondu (Moskva) ve Bütünrusiye çetel edebiyatınıñ devlet kütüphanesiniñ (Moskva) beraber yapılğan işidir.

2014 senesi 1314 senesi Eski Qırımda – Solhatta qurulğan Özbek camisiniñ 700 yıllığı qayd etile. XX asırnıñ 20-nci yılları şeerde keçirilgen qazmalar neticesinde Özbek camisiniñ kompleksine kirgen medrese ve qabristannen bağlı arheologik malümatlar tapılğan edi. Qazma işlerinde professor İlya Borozdin (1883-1959) reberlik yapqan – atiqiyatçı, tarihçı-şarqşınas ve qavmiyatçı.

Bağçasaraydaki türk-tatar medeniyetiniñ müzeyi, şu cümleden müdiri Usein Bodaninskiy ve Müzeyniñ İlmiy kâtibi Osman Aqçoqraqlı ekspeditsiyada faal iştirak etken ediler.
XS
SM
MD
LG