Link açıqlığı

Rusiye Federatsiyasınıñ qanunlarına köre, Ukrainada olğanı kibi, vatandaşlarğa topraqnıñ bedava berilmesi aqqında maddeler yoq.

Bunı GTRK «Krım» efirinde Qırım «parlamentiniñ» topraq, agrar, ekologiya ve maqul tabiat qullanuv meseleleri boyunca daimiy komissiya reisi Dmitriy Rogaçöv bildirdi, dep haber ete Argumentı nedeli-Krım.

«Eger de evelsi köyniñ er bir sakininiñ Ukraina Anayasа boyunca topraq damartasınıñ bedava qullanuvğa aluvına aqqı olğan olsa, Rusiyede böyle şey yoq, o tek ayırı imtiazlılar içün berile bile», – dedi Rogaçöv.

O qayd etti ki, bedava topraq damartasını almaq içün nevbette turğan qırımlılar onı endi yalıñız mezatta ala bilir.

«Fiyatı topraq damartasınıñ kadastr qıymeti ile belgilenecek»,– dedi Rogaçöv ve fiyat regionğa bağlı olğanını da ayttı.

O şuna da ümütini bildridi ki, Devlet Dumasına kirsetilgen işbu qanun imtiazlı vatandaşlarnıñ cevdelini ğayrıdan baqıp çıqmaq içün imkân berir, şu cümleden, sürgün etilgen vatandaşlarğa topraqnıñ ayırılmasını çezer.


«Vedomosti» gazetasınıñ malümatına köre, Rusiye, infrastrukturanı qurmaq içün, Qırımda topraqlarnı tutıp alacaqtır. Topraqlarnıñ tutıp alınuv ketişatı Rusiye iqtisadiy inkişaf nazirliginde azırlanğan qanun leyhasında yazıla.

Oña köre, akimiyet topraq saibine onıñ tutıp alınacağı aqqında qarar alınğanından soñ bir afta devamında bildirmek kerek. Saipniñ ise bu qarar ile razı olmaq içün 3 ay olacaq, aks alda topraqnı mahkeme vastası ile alacaqlar. Mahkeme qararına itiraznı bildirmek içün saipte 10 kün olacaq.
XS
SM
MD
LG