Link açıqlığı

Qırımda ukrain banklarınıñ yatırımcılarından tazminat aqqında arizalarnı qabul etmege devam eteler


İşğal etilgen Qırımda ukrain banklarınıñ müşterilerinden tazminat ödevi aqqında arizalarnı qabul etüv müddeti arttırıldı.

Bunı Qırım «İqtisadiyat nazirliginiñ» matbuat hızmeti bildire.

Arizalarnı «Yatırımcılarnı qoruv fondu» (YAQF) qabul ete.

Matbuat hızmetiniñ malümatına köre, Rusiye Federatsiyasınıñ bir sıra qanunları işke tüşürilgeni sebebinden, arizalarnı qabul etüv müddeti bir aydan 90 künge qadar arttırıla.

Böyle imkân Qırımda faaliyetini toqtatqan er bir ukrain bankınıñ müşterilerine berile.

Mayıs 8-de Qırımda «Yatırımcılarnı qoruv fondu» ukrain banklarınıñ müşterilerine tazminat ödep başladı.

2014 senesi aprel 1-ne qadar açılğan bank esapları boyunca tazminatlar ödenile.

Fond 300 biñ arizanı qabul etmege planlaştıra, dep bildire YAQF nezaret şurasınıñ reisi Andrey Melnikov. Ödevlerniñ miqdarı 30 mlrd rublege qadar teşkil ete bile.

İyün 5-ne qadar Fond 161 biñ arizanı qabul etti. 14,1 biñ müşteri 2,5 mlrd ruble miqdarında tazminatnı aldı.
XS
SM
MD
LG