Link açıqlığı

Qırımnıñ öz başına ilân etilgen baş naziri Sergey Aksönov kendi muavinleriniñ sayısını sekizge qadar arttırdı.

Bunıñ aqqında Aksönovnıñ Qırım «ükümetiniñ» matbuat hızmeti tarafından tarqatılğan devlet icra akimiyetiniñ terkibi aqqında «emirinde» aytıla.

Böyleliknen, endiden soñ Qırım «baş naziriniñ» birinci muavini ve 7 adiy muavini olacaq.

Vesiqada aşağıdaki «nazirlikler» de tasdiqlandı: maliye nazirligi, iqtisadiyat inkişafı nazirligi, medeniyet nazirligi, kurort ve turizm nazirligi, köy hocalığı nazirligi, emek ve içtimaiy qoruv nazirligi, sağlıq saqlav nazirligi, mesken-kommunal hocalığı nazirligi, içki siyaset, malümat ve alâqa nazirligi, transport nazirligi, mal-mülk ve topraq munasebetleri nazirligi, uquq nazirligi, yaqarlıq ve energetika nazirligi, fevqulâde vaziyetler nazirligi.

«Nazirler şurasınıñ» meydanğa ketirgen komitetler arasında: milletlerara munasebetler ve sürgün olunğan grajdanlarnıñ işleri boyunca komiteti, orman ve av hocalığı komiteti, suv hocalığı ve melioratsiya komiteti, medeniy mirasnı qoruv komiteti, devlet qaydı ve kadastr komiteti, balıq tutuv komiteti, fiyat ve tarifler komiteti, baytar komiteti.

Bundan ğayrı, Qırım «akimiyeti» strukturasında emek inspektsiyası, hocalıq maşinaları ve diger tehnikanıñ vaziyetini nezaret inspektsiyası, mesken nezaret inspektsiyası, devlet gaz nezareti ve energiya arttırılması inspektsiyası peyda oldı.

Qırım «devlet akimiyetiniñ» diger icra organlarında bular qayd etilgen: devlet arhiv hızmeti, qabarcılıqqa qarşı kürşe komiteti, raqiplik siyasetiniñ komiteti, Rusiye Federatsiyasınıñ Prezidenti yanında Qırım Cumhuriyetiniñ Daimiy Temsilciligi.

Fevral soñunda Qırım «parlamenti» öz başına ilân etilgen baş nazir ile yolbaşçılığında «Nazirler şurasınıñ» erkânını belgilep, onıñ 5 muavinini tayin etken edi.
XS
SM
MD
LG