Link açıqlığı

AQŞ ve Avropa Birligi Rusiye iqtisadiyatınıñ bakn, energetika ve mudafaa sektorlarına Ukrainada üküm sürgen vaziyetten sebep bir sıra ceza kirsetecek olalar.

Bunı AQŞ devlet kâtibiniñ Avropa işleri boyunca yardımcısı Viktoria Nuland iyün 16-da Washingtonda Marşalnıñ Almaniya fondunda çıqışta bulunıp bildirdi, dep haber ete Azatlıq Radiosı.

Nuland Rusiyeni separatistlerge kösterilgen yardım arttırılmasında, hususan Ukrainağa tanklar ve silâ yollanmasında qabaatladı. Bu qabaatlarnı Moskva red ete.

Onıñ qayd etkenine köre, soñki afta devamında vaziyet daa beter oldı, Rusiyege qol tutqan separatistler arbiy uçaqnı tüşürip, 49 ukrain arbiy adamını öldürdiler.

Buña baqmadan, Ukrainağa nisbeten AQŞ siyasetiniñ şekillendirilmesi içün mesülietli Nuland Ukraina prezidenti Petro Poroşenko ve Rusiye prezidenti Vladimir Putin arasında yaqında qurulğan bağlarnı alğışladı.

AQŞ ve Avropa Ukrainadaki vaziyetke er kün qıymet keseler, dep ayttı o. Onıñ aytqanına köre, Putin kendi areketlerini deñiştirmese, ceza alacaq. Bunı oña bildireler.

Nuland Washingtonnıñ «Mistral» Frenkistan vertolöt taşıyıcılarını Rusiyege berilmesine qarşı çıqqanını tekrarladı.
XS
SM
MD
LG