Link açıqlığı

Poroşenko: aqımdaki afta Ukrainada ateş toqtatılması teklif etilecek


Ukraina prezidenti Petro Poroşenko memleket şarqındaki cenkâver areketler bu afta yekünleycegine ümüt besley.

Bunı o, bazarertesi künü, iyün 16-da, Ukraina milliy havfsızlıq ve mudafaa Şurasınıñ toplaşuvını açar eken bildirdi, dep haber ete İnterfaks-Ukraina.

«Bu afta prezidentniñ teklif etilecek barışıq planınıñ inceliklerini muzakere etmege planlaştırıla. Bundan ğayrı, bugün SNBO qabul etecek qararlarğa köre, ateş toqtatılması prezidentniñ barışıq planını yerine ketirüvniñ başlanması olaraq teklif etilecek», – dep ayttı Poroşenko.

Aynı vaqıtta devlet yolbaşçısı qayd etti ki, ateş toqtatılması boyunca areketlerge ayırılacaq vaqıt sıñırlı olacaqtır.

Poroşenko Ukraina-Rusiye sıñırı üzerinde nezaretni bu afta ğayrıdan tiklemek niyeti bar olğanını aydılattı.

Ukraina prezidentiniñ aytqanına köre, sıñırdaki vaziyet Ukraina şarqında ateş toqtatılmasına keder etken yekâne sebeptir.

«Sıñır qapatılsa, birden ateş toqtatılmasını ilân ete bilemiz. Donetsk ve Luganskta üküm sürgen vaziyette ateş toqtatılmasını ilân etmek biraz mesülietsiz bir adımdır», – dep ayttı prezident.

O, dey ki, bugünde-bugün Silâlı quvetler, sıñırcılar ve Milliy gvardiyanıñ muarebege qabiliyeti ve azimkârlıq yahşı neticelerge ümüt etmege imkân bere.
XS
SM
MD
LG