Link açıqlığı

Keriç şeer yolbaşçısınıñ aylığı üç qat artqan soñ, Aksönov memurlarnıñ qazançlarını «tüzetecek»


«Rusiyeli» Keriç şeer şurasınıñ deputatları şeer yolbaşçısı Oleg Osadçiyniñ aylığına 200% para qoşıp, onıñ aylığını deñiştirmege qarar aldılar.

Keriç şeer şurasınıñ kâtibi Vladimir İdtniñ fikirince, bu Rusiye qanunlarına riayet ete, dep haber ete Qırım «akimiyetiniñ» ruporı Krıminform.

«Sessiyanıñ bütün qararları Rusiye Federatsiyasınıñ qanunlarına ters kelmey ve keçici devirge belgilengen qanunlarğa köre qabul etile. Qarar leyhaları uquqçılar tarafından tasdıqlanıla. Qalğanı – izaatsız. Men bunı siyasiy bir sual dep sayam», – dedi İdt.

Onıñ aytqanına köre, farqlı qoşmalar ola, lâkin 200% «aylıqqa qoşulması mümkün eñ çoq para».

Bunıñnen beraber, «Argumentı nedeli – Krım» saytınıñ malümatına köre, Qırımnıñ öz başına ilân etilgen «baş naziri» Sergey Aksönovnı Keriç şeer yolbaşçısı aylığınıñ bir qaç kere arttırılması açuvlandırdı. O, bunıñnen bağlı teşkerüvler olacağını bildirdi.

Aksönov qayd etti ki, keçici devir vaziyetinde memurlar aylıqnı tek 50%-ğa arttıra bileleler.

Aynı vaqıtta o, şunı bildirdi ki, aylıqnı üç qat arttırmaq «ne bugünki, ne de bir de bir diger vaziyette» olmamaq kerek.
XS
SM
MD
LG