Link açıqlığı

Saatnıñ esas haberi

BMT vekilleri işğal etilgen Qırım qaçaqlarına yardım etmek içün Kiyevge keldiler


Salı künü, iyün 10-da, içtimaiy siyaset naziriniñ birinci muavini Vitaliy Muşçininniñ Aqrusiye, Moldova ve Ukrainada Birleşken Milletler Teşkilâtınıñ qaçaqlar işleri boyunca Yuqarı Komissar İdaresiniñ temsilcisi Oldrih Andrisek ile körüşüvi olıp keçti.

Körüşüvniñ esas mevzusı – Qırım, Donetsk ve Lugansk vilâyetlerinden köçip kelgenlerge yardımdır.

Bunı Ukraina içtimaiy siyaset Nazirliginiñ matbuat hızmeti bildire.

«Eñ evelâ, bunıñ kibi vatandaşlarnı meskennen teminlev, içtimaiy devlet maddiy yardımı ve nefaqa, ve olarnı işnen teminlev aqqında laf yürsetile», – denile nazirlikniñ beyanatında.

Körüşüvde Muşçinin BMT tecribesi, hususan Ukraina şarqında üküm sürgen vaziyette, Ukraina içün ğayet müim olğanını qayd etti.

Taraflar kelecek afta nevbetteki körüşüvni keçirmege añlaştılar.

Keçken afta, iyün 7-de, Ukraina Yuqarı Radasınıñ binası yanında Qırım ve Donbasstan ketmege mecbur olğan adamlarnıñ aktsiyası ötkerildi. Olar kendi problemlerine deputatlarnıñ diqqatını celp etecek ediler.

Bundan ğayrı, «Mecburen köçip kelgenlerniñ birligi» CT halqara teşkilâtlarğa muracaatta bulunıp, qaçaqlar içün gumanitar missiya açılmasını istedi. Mında berilgen malümatlarğa köre, adamlarnıñ «yaşamaq, gecelemek yeri ve tedaviylenmek imkânları yoq».
XS
SM
MD
LG