Link açıqlığı

Qırım «ükümeti» Ukrainadan Şimal-Qırım kanalından berilgen Dnepr suvı içün ödevni bayağı arttırmağa azır. Bir kubometr suv fiyatı 0,6 kapikten 40 kapikke qadar ya da 1,2 rublege qadar artması mümkün, dep haber ete RİA Novosti.

«Evelden Qırım Ukrainanıñ bir qısmı olğanda, Dnepr suvı içün para tölemedi, bizler yalıñız hızmetler içün, bir kubometr içün 0,6 kapik ödey edik. Bugünde-bugün, Rusiyeniñ bir qısmı olıp, bizler suvnı satın almağa azırmız. Bizlerge bir kubometr içün 40 kapikke qadar suv fiyatı maqbul olur edi», – dep bildirdi Qırım «Devlet şurasınıñ» suv teminlevi işçi gruppasınıñ reberi Edip Gafarov.

O, şunı da qayd etti ki, Qırım Ukraina tarafına 1,74 million grivna miqdarında borcnı ödemege ve Şimal-Qırım kanalına ait tehnikanı bermege azır.

Gafarovnıñ aytqanına köre, Dnepr suvınıñ fiyatı ve ödev şartları Rusiye-Ukraina devletlerara añlaşmada qayd etilmek kerek. Bu vesiqanı tizmek içün ükümetlerara komissiyanı meydanğa ketirmeli.

Qırım işğalinden soñ yarımadanıñ ayrı şeerlerinde suv teminlevinen bağlı kergin vaziyet üküm sürip başladı, köy hocalıq topraqlarında suvaruv meselesi de havf astında qala.

Ukraina suv resurslarınıñ devlet agentligi resmiy şekilde bildirgenine köre, yerli «akimiyet» tarafından añlaşma munasebetleriniñ qurması boyunca belli bir teklifler olmağanından sebep, Şimal-Qırım kanalı Dnepr suvınıñ berilmesini toqtattı. Mında Qırım tarafından qanunsız alda suv alğanları ve 2013 senesi içün 1,7 mln. grn. miqdarında borc aqqında ayttılar.
XS
SM
MD
LG