Qırımlılar Ukraina deputatlarından köçip kelgenler problemleriniñ al etilmesini talap ettiler

Kiyev – Köçip kelgenlerniñ qanun boyunca statusını belgilemek, Ukraina parlamenti ve ükümetinde abadanlaştıruv programma ve mahsus hızmetlerni qabul etmek, – bunıñ kibi talaplarnı qırımlılar Ukraina Yuqarı Radasınıñ binası yanında cumaaqşamı künü, iyün 5-de, seslendirdiler.

Qırım.Aqiqat mühbiriniñ malümatına köre, olarğa Şarqiy Ukrainadan köçkenler de qoşuldı. Faaller Ukraina, Qırım ve qırımtatar bayraqlarını açtılar.

Aynı bu vaqıtta Maydannıñ yüzler Radası aktsiya keçirip, deputatlardan «ameliyet qanun leyhalarınıñ» qabul etilmesini istedi.

Birazdan miting iştirakçilerine Ukraina halq deputatı Vladimir Yüryev çıqtı. ​Şarqiy Ukrainadan kelgenler oña Ukraina akimiyetine yollanılğan muracaatnı tuttırdılar, qırımlılar ise Qırımdan mecburen ketkenlerniñ birinci qurultay neticeleri aqqında tarif ettiler. Deputat bu malümatnen tanış olmağa ve meseleniñ al etilmesine isse qoşmağa vade etti.

Bunıñ kibi aktsiya iyün 6-da ötkerilecek. Onı «Mecburen köçip kelgenlerniñ birligi» CT reisi Nikolay Podolâka ilân etti. O, halqara teşkilâtlarğa muracaatta bulunıp, ketmege mecbur olğanlar içün gumanitar missiya açılmasını istedi. Podolâkanıñ aytqanına köre, bu adamlarnıñ yaşamaq, gecelemek ve tedaviylenmek yerleri alâ daa yoq.