Link açıqlığı

Saatnıñ esas haberi

«Reportörı bez granits» teşkilâtı Qırım ve Donbassta jurnalistlerni qorumağa çağıra


«Reportörı bz granits» teşkilâtı bildirdi ki, onı Ukraina şarqında ve Rusiyege qoşulğan Qırımda jurnalistlerni esir aluv meselesi raatsızlay, dep haber ete Azatlıq Radiosı.

Uquq qorçalayıcılar Rusiye ve Ukraina akimiyetleri, em de Ukraina şarqındaki birleşmelerni kütleviy haber vastaları hadimleriniñ aq-uquqlarını qoruv ve olarğa riayet etüvde qol tutmağa çağıralar.

«Reportörı bez granits» beyanatında jurnalistlerge yapılğan bir qaç ücüm, şu cümleden iyün 2-de Aqmescitte «halq imayesi» tarafından «Tsentr jurnalistskih rassledovaniy» hadimleri Sergey Mokruşin ve Vladlen Melnikovnı yaqalav qayd etile. Olarnı köteklediler, cep telefonlarını tutıp aldılar. Birazdan ştabqa politsiya hadimleri keldi ve jurnalistlerni öz bölügine alıp kettiler. Sorğudan soñ ekisini de yiberdiler.

İyün 2-de ise Donetskte Maydanğa qarşı çıqqanlar «Donbass» neşiriniñ hadimi

Aleksandr Brij ve «Veçerniy Donbass» gazetasından Leonid Lapanı yaqaladılar. Neticede azat etilgen eki jurnalistniñ aytqanına köre, olardan muarririyet siyasetine tesir etilmesini talap ettiler.

Mayıs 10-dan berli ukrain jurnalisti Artöm Larionov aqqında bir de bir malümat yoq. Dostlarınıñ aytqanına köre, soñki kere onı Slavânsk ve Kramatorsk arasında ordu kiriş noqtasında körgen ediler.
XS
SM
MD
LG