Link açıqlığı

Qırımda yaqalanğan ukrain kinorejissöri Oleg Sentsovnı qıynap, malümat alacaq ediler, dep bildirdi onıñ advokatı Dmitriy Dinze.

«Eho Moskvı» malümatına köre, advokat Rusiyeniñ Taqiqat komitetine şikâyet etti. Advokat bergen vesiqağa köre, Qırımda yaqalanğan Sentsovnı Aqmescitteki FSB idaresinde köteklediler ve qorquzdılar.

Dizne bildire ki, şimdi Sentsov Moskvada SİZOda buluna. Advokatnıñ aytqanına köre, anda rejissör zarar körmey.

Rusiye FSB ukrain kinorejissöri Oleg Sentsovnı terakt teşkil etilmesinde qabaatlay. Onı mayıs 11-de Aqmescitte yaqaladılar.

Ukraina tarafı Rusiyeden bir qaç kere rejissörni azat etmege talap etti.

Çarşenbe künü, iyün 4-de, Kiyevdeki Frenkistan elçihanesi yanında faaller «işğal etilgen Qırımda Rusiye mahsus hızmetleriniñ hadimleri tarafından insan aq-uquqlarınıñ bozuluvına» emiyet bermege rica ettiler.

Faaller Frenkistannı bu meseleni iyün 6-da Normandiyada ittifaqdaşlar orduları qonmasınıñ 70 yıllığınen bağlı tedbirlerde muzakere etmege çağırdılar. Bu merasimlerge Rusiye prezidenti Vladimir Putin de davet etildi.
XS
SM
MD
LG