Link açıqlığı

Qırım «parlamenti» «Qırım Cumhuriyetiniñ devlet timsalleri aqqında», «Qırım Cumhuriyetiniñ qanunlarını qabul etüv, aydınlatuv, işke tüşürilüv ve saqlap qaluv aqqında», «Qırım Cumhuriyetinde belediye sıñırları ve olarnıñ status belgilemesi aqqında» bir sıra qanunlarnı ekinci oquvda qabul etti.

Bunı «parlamentniñ» matbuat hızmeti bildire.

Deputatlar bu qanunlarnı deñişmelernen qabul ettiler. Bundan ğayrı, «Qırım Cumhuriyetinde yerli idare organlarınıñ strukturası ve adları, sayısı, vekâletler müddeti ve Qırım Cumhuriyetinde birinci çağırılış belediye temsil organlarınıñ deputatlar saylavlarınıñ sanı aqqında» qanun ekinci oquvda qabul etildi.

Qırım «spikeriniñ muavini» Konstantin Baharevniñ aytqanına köre, işbu «qanun» leyhası yerli idare organlar saylavlar keçirilmesiniñ tertibini belgiley.

«Şeer bölgeleri ve şeer qasabalarında belediyeniñ temsil organı belediye saylavlarında saylana. Belediye yolbaşçıları deputatlardan saylana, yerli memuriyette «Rusiye Federatsiyasınıñ yerli idare organlarını teşkil etüv printsipleri aqqında» federal qanunğa köre tizilgen aqlaşma esasında tayin etilgen yolbaşçı idare ete. Qasabalarda da temsil organı belediye saylavlarında saylana, yolbaşçı ise deputatlardan saylana», – dep añlattı Baharev.

Bundan ğayrı, «Qırım Cumhuriyetinde belediye temsil organlarınıñ deputatlar saylavları aqqında» «qanun» leyhası ekinci oquvda qabul etildi.

Mayıs 27-de Rusiye prezidenti Vladimir Putin 2014 senesi sentâbr 14-te Qırım ve Aqyarda saylavlar ötkerilecegini tasdıqlağan federal anayasa qanunını imzaladı. Deputatlarnıñ saylavları aqqında qanun Qırım «parlamenti» tarafından mayıs başında qabul etildi. Deputatlar Saylav komissiyasını şekillendirip, onı tasdıqladılar.

«Areket» Qırım uquq qorçalayıcı merkezinde qayd etkenlerine köre, Qırım «parlamenti» tarafından saylavlar aqqında qabul etilgen qanunlar yerli ealini şeer yolbaşçıları ve qasaba reislerini saylamaq aqqından marum qaldıra.
XS
SM
MD
LG