«Yatırımcılarnı qoruv fondu» iyün 4-de işğal etilgen Qırımda «Oşçadbank» ukrain bankınıñ müşterilerine tazminat ödep başlaycaq.
Bunı Fondnıñ matbuat hızmeti bildire.
«Müşterilerniñ Rusiye milliy ticaret bankında açqan esaplarına ödev parası kelecek», – aytıla beyanatta.
Ödev aqqında malümat alğan yatırımcı tazminat almaq içün onıñ şahsiyetini tasdıqlağan vesiqa, em de bergi töleyiciniñ esap varaqasına identifikatsion nomerasını berüv kâğıtınen RNKB bölügine muracaat etmeli.
Bank ödev ve añlaşma boyunca talaplarnı bankta açılğan esapqa avuştıruv aqqında azırlağan vesiqalar imzalanğan soñ, yatırımcı bu künü paranı elde etmesi mümkün.
Fond qayd ete ki, tazminat ödevi bedava olacaq.
Tazminat ödevi arizalarını «Oşçadbank» ofislerinde yerleşken 54 noqta qabul ete. İyün 3-ne qadar 2 mlrd rublelik 15,5 ariza qabul etildi.
«Yatırımcılarnı qoruv fondu» Qırımda faaliyetini toqtatqan «Oşçadbank» ukrain bankınıñ müşterilerine tahminen 5 mlrd ruble ödemege planlaştıra.
Mayıs 22-de «Oşçadbankta» bildirdiler ki, Qırımnıñ öz başına ilân etilgen akimiyeti devlet maliye müessisesiniñ anbarından 32,45 mln grn çıqarıp, belli olmağan bir yerge alıp ketti. Bu para nefaqacı, saqat, veteran, balalı qorantalarğa berilecek edi.
«Oşçadbank» ketirilgen zarar aqqında vesiqalar azırlap, Ukrainanıñ Rusiye Federatsiyasına qarşı mahkeme davasında iştirak etecek.
